VOV4.Jarai - Tŏ tui hơdôm bruă mă bruă ƀơi Thanh Hoá, mơguah lơ 29/8, Khua mir sir ơi Nguyễn Xuân Phúc git gai mông mă bruă hăng Khul apăn bruă Ping gah tơring čar Thanh Hóa. Nao jơnum hrŏm hơmâo kơ-iăng Khua dêh čar ơi Lê Văn Thành, Khua mua sa, dua ding jum, gơnong bruă. Đĭ pơhiăp amăng mông mă bruă, Khua mir sir ơi Nguyễn Xuân Phúc pơsit tong glăi thun 2029 lĕ 1.000 thun akŏ pơjing anăn Thanh Hoá. Yua anun, Ping gah, gong gai tơring čar kiăng kơsem min, ngă gêh gal kiăng hrưn đĭ djop mơta anăp nao tal hơdor glăi yôm phăn mơng kual lŏn hơmâo lu gru grua hing ang pioh glăi mơng đưm hlâo.

Khua mir sir ơi Nguyễn Xuân Phúc git gai mông mă bruă hăng Khua apăn bruă Ping gah Thanh Hoá

Khua mir sir brơi thâo, Thanh Hoá pơđĭ kyar tui ră anai lĕ aka ƀu djơ̆ hăng gru grua pơđĭ kyar kah hăng tơlơi dưi amăng tơring čar. Khua mir sir rơkâo tơring čar kiăng gir run tŭ mă abih hơdôm hơdră bruă yôm phara hơmâo gơnong glông pơtrun kiăng kơ hrưn đĭ kơtang dong. Sit biă ñu, Khua mir sir ơi Nguyễn Xuân Phúc pơtă pơtăn, pơđĭ kyar bơwih ƀong huă kiăng pơlir hăng pơđĭ kyar gru grua laih dong ngă pơplih phrâo, bơkơnar amăng mơnuih mơnam. Djă pioh hăng lăi pơthâo gru grua ƀon lan, pơsur pran pơ-ư ang djuai ania, pran kơtang pơđĭ kyar plơi pla lŏn ia.

Siu Đoan: Pơblang