VOV4.Jarai - Mơguah lơ 5/4, ƀơi Ƀirô mă bruă, Khua mir sir ơi Nguyễn Xuân Phúc mă bruă hăng Khul kyâo bơrơkal mriah Việt Nam kơ bruă pok pơhai blan djru ană mơnuih thun 2022. Thun anai, Khul kyâo bơkơkal mriah Việt Nam pơjing akŏ bruă pok pơhai djru ană mơnuih thun 2022 hăng anăn: “Pơlir hơbit mơnuih mơnam - lar hyu pran gum djru ană mơnuih” hăng hơdôm bruă anun lĕ: pơphun khut khăt kiăng pơtrut pơsur bruă djru brơi ană mơnuih; pơtrut kơtang amăng bruă pơtô pơblang hơdôm anŏ yôm mơng bruă djru brơi ană mơnuih hăng bruă mă mơng Khul kyâo bơrơkal mriah; kơtưn hơdôm bruă gum djru amăng mơnuih mơnam, pel ĕp, lăng glăi hăng pơphô hơdôm hơdră bruă  bơdjơ̆ nao hơdôm bruă djru brơi ană mơnuih hăng bruă mă amăng Khul.

Git gai amăng mông mă bruă, Khua mir sir ơi Nguyễn Xuân Phúc tŭ ư bruă pơphun blan djru ană mơnuih gưl dêh čar thun 2022 tui tơlơi rơkâo mơng Khul hăng tŭ ư bruă pơphun lăng glăi ngă tui tơlơi črâo trun mrô 18 thun 2018 mơng Khua dêh čar kiăng kơ hrưn đĭ tŭ yua amăng bruă djru mơnuih mơnam hăng bruă mă mơng Khul kyâo bơrơkal mriah amăng rơnuk phrâo.

Siu Đoan: Pơblang