VOV4.Jarai-Ƀrô djơ̆ bơyan mơak mlam Blan bơrơmi ria, Khua mir sir ơi Nguyễn Xuân Phúc mơ-it hră truh pơ ƀing ană amôn, čơđai muai. Amăng hră mơ-it, Khua mir sir pơpŭ kơ abih bang čơđai muai Việt Nam hok mơak mlam Blan bơrơmi ria trơi pơđao hrom hăng sang anŏ, amĭ ama, ơi yă phung wang, kah pơpha tơlơi khăp pap hăng čơđai muai tơnap, kơƀah kơƀap ƀu bưng băi, ƀu tơphă ôh amăng tơlơi hơdip mơda, kiăng hơmâo mơ̆n Têt trung thu, mlam Blan bơrơmi ria hok mơak hăng tŭ yua.

Khua mir sir ơi Nguyễn Xuân Phúc ƀơk gơnam kơ čơđai muai ( Hră pơhing ANTĐ)

Khua mir sir pơdah pran jua čang rơmang, ƀing čơđai muai amăng dêh čar hok mơak, gir run găn rơgao tơlơi tơnap tap amăng hrăm hră, amăng tơlơi hơdip mơda rĭm hrơi. Laih dơ̆ng rơkâo djop sang anŏ gŏ awă (uă), djop gưl kơnuk kơna, anom bruă hăng mơnuih mơnam, hăng tơlơi glăm ba, gơgrong hrom djru khăp pap, pơtrut hloh dơ̆ng, đing nao lăng ba ƀing čơđai tơnap tap amăng hrơi mơak Blan bơrơmi ria, boh nik ñu hăng čơđai muai ană drit druai, čơđai tơnap tap, dŏ pơ kual ataih, kual asuek, giăm guai dêh čar, bul pơtâo ia rơsĭ kiăng abih bang čơđai muai anet dưi lăng ba djop djel, rơnuk rơnua, hiam klă.

Nay Jek: Pơblang