VOV4.Jarai - Mơguah lơ 6/4, ƀơi tơring čar Tiền Giang, Khua mir sir dêh čar ta ơi Nguyễn Xuân Phúc nao čuă hơdră bơwih ƀong huă sĭ mơdrô mơng Anom mă bruă hrom thanh long Mỹ Tịnh An, tơring glông Chợ Gạo, sa hơdră mă bruă ba glăi bôh tơhnal gơnang kơ pơlir hơbit mơnuih ngă đang hmua kơjăp, pha ra lĕ juăt pơhrui blơi thanh long kơ mơnuih amăng anom hăng nua lu hloh kơ ƀơi anih sĭ mơdrô, pơhlôm kơmlai ƀiă hloh 3.000 prăk sa kg wot gah rơngiao sĭ trun nua. Khua mir sir dêh čar ta pơsit yôm Anom mă bruă hrom Mỹ Tịnh An hmâo hơdră bơwih ƀong huă sĭ mơdrô ba glăi bôh tŭ yua, pơphun pơlir hơbit bruă bơwih ƀong klă, pơđĭ kyar plơi pla bôh thanh long phun ƀơi tơring čar kah hăng thanh long, bôh pơđung. Gơnam ngă rai hăng hơdră phrâo, pơhlôm tơhnal pơkă prong, anăp nao sĭ kơ dêh čar tač rơngiao tơnap sĭ hloh tui jơlan gah pơkă phun. Khua mir sir dêh čar ta ăt rơkâo mơn Anom mă bruă hrom Mỹ Tịnh An pơtrut kơtang dong bruă pơlir hơbit, pok prong lŏn pla lu mơta bôh troh phun pơkon mơng tơring car, rơngiao kơ thanh long; hmâo jơlan gah sĭ gơnam ngă rai kơ dêh čar tač rơngiao hăng amăng lŏn ia./.

Siu H’ Prăk: Pơblang