VOV4.Jarai-Tlam mơmŏt lơ 6/4, amăng mông jơnum đơ đam dêh čar ta anăp nao kơ hrơi Huă pơsat pơtao Hùng lơ 10/3 blan ta, ƀôn prong Cần Thơ jơnum ba yua pra yang h’ŭ kơ ơi pơtao Hùng, sa ring bruă prong gru grua hiam pơdah rai bruă ngă hăng boh pia ƀong boh hơdor kơ pô pla mơñum ia hơdor kơ čroh hnoh mơ̆ng djuai ania ta, kiăng hơdor bơni pran jua akŏ pơdong lŏn ia mơ̆ng ơi pơtao Hùng đưm đă adih. Pok mông jơnum ngă lơphet lĕ, ƀơi pra yang phun h’ŭ kơ pơtao Hùng, Khua mir sir ơi Nguyễn Xuân Phúc ba jơlan hlâo ƀing khua mua kơnuk kơna, khua mua hơđăp ping gah, kơnuk kơna dêh čar ta nao čuh ñang h’ŭ, hơdor tơngia bơni kơ pran jua mơ̆ng hơdôm rơnuk pơtao Hùng.

Khua mir sir ơi Nguyễn Xuân Phúc ngă khua pô ngă yang čuh ñang hlâo ƀơi tơrưng ngă yang bơngăt yă bai ơi bung kơ dêh čar anun lĕ pơtao Hùng, ơi Lạc Long Quân, yă Âu Cơ, Lạc tướng hăng Lạc Hầu. Čih pioh tơlơi hơdor amăng hơdrôm hră anih ngă yang, Khua mir sir ơi Nguyễn Xuân Phúc pơdah pran jua, anih anai jing anih pơpŭ ngă yang bơngăt jua gru grua hiam hơdor kơ hơdôm rơnuk pơtao Hùng đưm ƀơi kual lŏn gah dơnung dêh čar laih anun pơtruh nao rai bruă ngă gru grua bơngăt jua hăng pra yang pơsat prong Đền Hùng pơ kual lŏn gah kơdư, kah hăng arăt drah rô pơtruh nao rai kual kơdư hăng dơnung dêh čar jing sa boh sang, ia krông, čư̆ siăng sa ruăi, sa hnoh, pơđĭ kyar pơdrong asah hing ang.

Nay Jek: Pơblang