VOV4.Jarai - Tlam lơ 27/5, Khua mir sir ơi Nguyễn Xuân Phúc tŭ jum Khul mơnuih Hàn Quốc ƀơi Việt Nam yua yă Chang Eun Sook, Khua khul ba jơlan. Khua mir sir ơi Nguyễn Xuân Phúc lăi nao tơlơi rô nao rai hiam klă tơdơi kơ 30 thun ngă hrŏm Việt Nam - Hàn Quốc akŏ pơdong bruă pơtom hiăp laih anun ră anai glăk jing gŏp ngă hrŏm yôm. Hàn Quốc jing dêh čar hơmâo prăk tuh pơ plai prong ƀơi Việt Nam, pơƀut hơmâo 80 klai dolar Mi hăng rơbêh 9.000 kơčăo bruă. Ră anai, hơmâo rơbêh 200 rơbâo čô mơnuih Hàn Quốc glăk dŏ hơdip, mă bruă ƀơi Việt Nam. Bơ ƀơi Hàn Quốc ăt hơmâo năng ai 200 rơbâo čô mơnuih Việt Nam dŏ hrăm hră, ngă bruă, hơdip mơda mơn. Yua tui anun, Khua mir sir kiăng Khul mơnuih Hàn Quốc ƀơi Việt Nam hơmâo lu hơdră pơtrut tui tơlơi ngă hrŏm dua bơnah amăng lu bruă.

Siu H’Mai: Pơblang