Ƀơi mông bơkơtuai, dua čô khua hơmâo tŭ ư hrŏm ăt sem lăng tong ten, git gai pơčrâo ba djop anom bruă dua bơnah pơtum pok pơhai ngă tui boh tơhnal Mông bưp nao rai dua bơnah Ding jum kơđi čar hăng hơdôm pok hră bơ tŭ ư mơ̆ng khua mua pơprong phrâo anai; hur har prăp lui klă tal jơnum lok 47 Jơnum min pơlir hơbit dua bơnah kơnuk kơna dêh čar pơ anăp anai; pơtrut hmar hloh bruă pơsir hĭ tơlơi tơnap tap gun gan mơ̆ng hơdôm kơčăo bruă phun kiăng ba tơlơi bơwih ƀong huă dua bơnah dêh čar, biă mă ñu hơdră dăp hlâo bruă bơwih ƀong huă hơđong, tŭ yua lu.

Dua čô khua ăt tŭ ư hrŏm pơtrut dơ̆ng bruă pơtô pơblang, pơhrăm kơ gru phun dêh čar biă mă ñu tơlơi ngă giăng mah Việt Nam-Lao, kơtưn kah pơpha tơlơi pơhing hmao kru hăng ngă hrŏm tong ten dong yua, djru nao rai tơdruă ƀơi mông jơnum amăng kual hăng amăng jar kmar.