Anai lĕ bruă mă yom biă mă amăng tal čơkă jơnum ruah khua khul ană amôn Wa Hồ săng amăng dêh čar ta tal X kiăng apah bơni kơ ƀing ană amôn hrăm thâo, săng, rơgơi pơ anăn ană amôn Wa Hồ săng rơgơi hloh mơ̆ng thun 2020-2025 amăng bruă mă “Čơđai muai Việt Nam pơkơtưn ngă tui 5 mơta tơlơi Wa Hồ pơtô”. Pơhiăp ƀơi mông jơnum, Khua mir sir ơi Lương Cường bơni hơdôm boh tơhnal hiam klă, rơgơi hloh mơ̆ng 500 čô ană amôn hur har ba gru hlâo anăn ană amôn Wa Hồ săng, hrŏm hăng abih bang mơnuih tơpuôl čơđai sang hră, tơdăm ngek dra muai, čơđai anet hơmâo ngă lu bruă hiam amăng thun blan rơgao.

Khua mir sir brơi thâo, hlăk dŏ hơdip, Wa Hồ pioh lu tơlơi khăp ƀu-eng leng ôh kơ ƀing čơđai muai Việt Nam. Khua mir sir đăo kơnang ƀing ană amôn čơđai muai amăng đơ đam dêh čar ăt amra gir run hloh, kơtưn amăng bruă mă, hrăm hră pơar, gưt hiăp, hơdip tơpă, săng, djă pioh hăng pơđĭ tui anŏ hiam gru grua mơ̆ng djuai ania Việt Nam ta khin hơtai.