Amăng hrơi mă bruă blung a jơnum lok 8, khua mua pơ ala mơnuih ƀôn sang dêh čar tal XV, tlam tom brơi, lơ 21/10, ƀing pơ ala mơnuih ƀon sang dêh čar hơmâo ruah Khua mir sir Lŏn ia Cộng hòa xã hội chủ nghĩa Việt Nam rơwang bruă thun 2021-2026. Boh tơhnal, ding kơna ding jum kơđi čar, khua gum bruă git gai ping gah dêh čar ơi Lương Cường dưi hơmâo ƀing pơ ala mơnuih ƀôn sang dêh čar ruah ngă Khua mir sir Lŏn ia Cộng hòa xã hội chủ nghĩa Việt Nam rơwang bruă thun 2021-2026. Hră pơtrun kơ bruă ruah ơi Lương Cường ngă khua mir sir dưi hơmâo ƀing pơ ala mơnuih ƀôn sang dêh čar pơsit laih hăng lu mơnuih tŭ ư ruah đĭ. Gah yŭ kơ hla gru mriah, rup pơtŭ kơñĭ tong krah, Khua mir sir Lŏn ia CHXHCN Việt Nam rơwang bruă thun 2021-2026, ơi Lương Cường khua mir sir phrâo hơmâo ƀuăn tui anai: “Khom tong ten hăng Lŏn ia, hăng Mơnuih ƀôn sang, hăng Phiah phiăn lŏn ia CHXHCN Việt Nam; gir run abih pran jua ngă pơgiong bruă jao mơ̆ng Ping gah, Kơnuk kơna hăng mơnuih ƀôn sang".

Ơi Lương Cường arăng tơkeng lơ 15/8/1957; Plơi pla phun Să Dữu Lâu, plơi prong Việt Trì, tơring čar Phú Thọ. Khua mir sir ơi Lương Cường tom ngă khua hơdôm bruă: Khua anom bruă kơđi čar Quân đoàn 2; Khua anom bruă kơđi čar Quân đoàn 3. Blan 1/2016, ƀơi mông jơnum ruah khua ping gah tal XII, ơi Lương Cường dưi ruah ngă ding kơna apăn bruă ping gah dêh čar. Jơnum lok ping gah tal anai hơmâo ruah ơi Lương  Cường ngă ding kơna Khul git gai ping gah dêh čar tal XII. Blan 4/2016, ơi Lương Cường, dưi hơmâo Ding jum kơđi čar jao bruă ngă Khua anom bruă phun kơđi čar, ling tơhan mơnuih ƀôn sang Việt Nam. Blan 1/2019 ơi Lương Cường dưi pơđĭ grat tơhan krên dên Đại tướng. Jơnum ruah khua ping gah dêh čar tal XIII, ơi Lương Cường ăt dưi ruah ngă ding kơna apăn bruă ping gah dêh čar laih anun dưi ruah ngă ding kơna Ding jum kơđi čar tal XIII. Blan 5/2024, Ding jum kơđi čar jao bruă kơ ơi Lương Cường, ding kơna ding jum kơđi čar, Khua anom bruă phun kơđi čar ling tơhan mơnuih ƀôn sang Việt Nam ngă ding kơna Khul git gai ping gah dêh čar hăng ngă Khua gum bruă git gai ping gah dêh čar.