Jao hră pơđĭ grat hăng đĭ pơhiăp ƀơi mông jơnum, pơ ala kơ ping gah, kơnuk kơna lŏn ia, Khua mir sir ơi Lương Cường bơni hơ-ơč kơ ơi Lê Quang Minh, bơni kơ ling tơhan mơnuih ƀôn sang Việt Nam hăng anom bruă phun kơđi čar ling tơhan mơnuih ƀôn sang Việt Nam. Lăi pơtong, anai lĕ tơlơi mơak, tơlơi hing ang laih anun lăp pơ ư ang kơ ƀing khua mua, ling tơhan mơnuih ƀôn sang; laih anun tơlơi mơak pơ ư ang mơ̆ng drơi jăn pô, sang anŏ hăng plơi pla ơi Lê Quang Minh.

Đĭ pơhiăp ƀơi mông jơnum, Thượng tướng Lê Quang Minh lăi pơtong, amra djă kơjăp hloh tơlơi git gai pơčrâo ba mơ̆ng Khua mir sir; tong ten hăng Ping gah, Lŏn ia hăng mơnuih ƀôn sang dêh čar; hur har ăt hrăm hăng hla tui tơlơi pơtô mơ̆ng Khua mir sir Hồ Chí Minh kơ drơi jăn kơnuih sa čô mơnuih ngă khua tơhan grat krên dên: Rơgơi kơhnâo, khin hơtai, luă gŭ, đăo kơnang, tơpă, tong ten. Laih anun ăt gir run pơhrăm drơi jăn, pran jua djă pioh tơlơi hiăm tơpă mơ̆ng sa čô mơnuih ngă hơkrŭ kơ lŏn ia, amra tŭ mă bruă jao hăng ngă pơgiong djop tơlơi Ping gah, kơnuk kơna lŏn ia, ling tơhan hăng mơnuih ƀôn sang jao brơi.