Tŭ ư tơlơi jak iâu mơ̆ng khua git gai ping gah mơnuih ƀôn sang Lao, Khua mir sir dêh čar Lao, ơi Thongloun Sisoulith, tlam lơ 24/4, Khua mir sir ơi Lương Cường ba jơlan hlâo grup khua mua mơ̆ng dêh čar Việt Nam pơpĕ laih mơ̆ng Hà Nội nao čuă gưl kơnuk kơna truh pơ dêh čar Lao mơ̆ng lơ 24 truh lơ 25/4/2025.

Hăng tơlơi pơsit pơtrut ngă tui djop hră pơkôl pơkă khua mua pơprong, tal nao čuă anai mơ̆ng Khua mir sir ơi Lương Cường nao pơ dêh čar Lao hơmâo boh yom prong biă mă, ăt pơtong glăi sit nik jơlan hơdră, tơlơi pơtrun sa hơnơ̆ng mơ̆ng Ping gah, kơnuk kơna Việt Nam lăng yom biă mă hăng đing nao tơlơi ngă giăng mah tong ten, gum pơgôp plah wah khua mua pơprong dua boh dêh čar; lăng yom Kơnuk kơna Lao hăng tơlơi ngă pŭ ƀăn yom phara Việt Nam-Lao jing hơdôm bruă mă đing nao hlâo hloh amăng bruă pok pơhai djop jơlan hơdră pơtom hiăp mơ̆ng pô, pơtong sit tơlơi dong yua kơtang biă mă mơ̆ng Việt Nam hăng bruă mă pơblih phrâo ƀơi dêh čar Lao.