Amăng tal nao čuă jơmư gưl kơnuk kơna dêh čar truh pơ Êjip, mơguah lơ 4/8, tui mông pơ anih nao, Khua mir sir ơi Lương Cường hăng grup khua mua mơ̆ng Việt Nam truh laih hăng mut jơnum, đĭ pơhiăp amăng khul pơlir hơbut Arab či plơi prong jưh jom Kairo hăng akŏ tơlơi pơhiăp “Pok jơlan hơdră phrâo amăng bruă ngă giăng mah hăng ngă hrŏm plah wah Việt Nam hăng djop dêh čar Arab yua rơnuk rơnua, ngă hrŏm laih anun pơđĭ kyar. Khul pơlir hơbit Arab lĕ khul ngă hrŏm djop dêh čar Arab amăng kual ơi jŭ hăng bul pơtâo Arab, dưi akŏ pơjing mơ̆ng thun 1945. Ră anai, khul Arab hơmâo 22 boh dêh čar ngă ding kơna.

Blan 7 /2023, Việt Nam hăng khul Arab hơmâo akŏ pơjing tơlơi phiăn ngă hrŏm. Đĭ pơhiăp amăng mông jơnum tal anai, Khua mir sir ơi Lương Cường lăi pơtong: Việt Nam čang rơmang hrŏm hơbit čih pioh sa bơnah phrâo jơlan hơdră mă bruă hrŏm lu bơnah plah wah Việt Nam hăng khul Arab kah hăng adơi ayong yua kiăng rơnuk rơnua mơak, ngă hrŏm laih anun pơđĭ kyar. Yap glăi hơdôm boh tơhnal dưi ngă laih prong prin amăng gru phun Việt Nam čih pioh giăm 40 thun laih rơgao pơblih phrâo, Khua mir sir ăt kah pơpha 5 mơta tơlơi hrăm prong kơ bruă mă găn rơgao thâo thăi. Ră anai, ping gah, kơnuk kơna Việt Nam hơmâo pơdah thâo hơdră lăng nao pơ anăp adih phrâo hloh, gir run kiăng trun thun 2045 ba Việt Nam jing lŏn ia pơđĭ kyar pơdrong, pơhrui glăi prăk kăk lu hloh. Khua mir sir ăt lăi pơtong, Việt Nam pơpŭ biă mă, djă pioh hăng pơ-ư pơ-ang lơ̆m bruă pơtom hiăp jai hrơi tŭ yua hăng ƀuh rơđah pơblih klă. Khua mir sir ăt rơkâo dua bơnah kơtưn hloh ngă hrŏm pơphun jơnum prong lu bơnah amăng kual hăng jar kmar, kiăng hrŏm hơbit pơtrut tơlơi rơnuk rơnua mơak hơđong amăng kual, gum hrŏm akŏ pơdong rŏng lŏn tơnah hiam klă hloh, thâo khăp pap, lăp hơdip mơda hloh.