Pơhiăp ƀơi mông jơnum, Khua mir sir ơi Lương Cường pơdah pran jua hok mơak nao čuă ƀing khua mua, ling tơhan Quân đoàn 12 jing Quân đoàn pơphun bruă mă hơbôt hyôt, samơ̆ kơtang blung a amăng ling tơhan mơnuih ƀôn sang Việt Nam. Pơ ala kơ khua mua ping gah, kơnuk kơna lŏn ia, Khua mir sir ơi Lương Cường čih pioh, lăng yom, bơni kơ boh tơhnal mơ̆ng ƀing khua mua hăng ling tơhan Quân đoàn 12 dưi ngă laih thun blan rơgao.

Khua mir sir rơkâo, bruă mă jơnum ping gah dêh čar tal XIII, gah ling tơhan Quân đoàn gir run ngă pơgiong tơhnal jao laih anun ngă djơ̆ hră pơtrun jơnum ruah khua ping gah amăng ling tơhan tal XI. Quân đoàn ăt ngă klă amăng bruă hơdai gum hrŏm djop anom bruă ping gah, gong gai kơnuk kơna plơi pla, akŏ pơdong tơdron blah kơjăp amăng pran jua, anih pơhlôm pơgang tong ten kơjăp phik.