Ƀrô djơ̆ tal nao čuă jơmư sit nik dêh čar Peru hăng jơnum hrŏm khua mua pơprong sa wơ̆t hrơi tơjuh pơčrong sai ngă hrŏm bơwih ƀong huă kual ASIA-Thái Bình Dương (APEC) thun 2024, mơguah lơ 13/11 tui mông Việt Nam, ƀơi plơi prong jưh jom Lima, Khua mir sir ơi Lương Cường nao čuă hăng mă bruă tom sang bruă dăng kông Viettel Peru (Bitel)-ngă hrŏm sĭ mơdro bơwih ƀong mơ̆ng Group Tuh tia pơkra ming-dăng kông ling tơhan (Viettel) ƀơi Peru.

Pơhiăp ƀơi mông jơnum mă bruă, Khua mir sir ơi Lương Cường lăi pơtong, gah yŭ kơ tơlơi git gai, pơčrâo ba mơ̆ng anom bruă ping gah ling tơhan dêh čar, Ding jum ling tơhan, pô jĕ giăm hloh, git gai na nao lĕ ping gah, khul khua mua Viettel, ƀing khua apăn bruă, ling tơhan, mơnuih mă bruă Bitel hơmâo ngă djơ̆ kơnuih sa čô tơhan rơnuk wa Hô, beč bal, thâo rơgơi, khin hơtai, thâo gum pơgôp, găn rơgao hĭ tơlơi tơnap tap lông lăng hơduah ĕp hơdôm bruă mă phrâo, anŏ phara ba dêh čar, anih dŏ djru kơ anom bruă Bitel dưi pơđĭ kyar ƀơƀrư̆, kơjăp amăng anih anom sĭ mơdrô phrâo amăng kual lŏn tơnap tap tŭ jum arăng ƀơi Mỹ Latinh. Khua mir sir lăi lĕ, boh tơhnal tŭ yua mơ̆ng Bitel brơi ƀuh, anŏ gêh găl hăng tơlơi rơgơi kơhnâo mơ̆ng Việt Nam dưi mơ̆n ba hyu truh pơ djop anih amăng rŏng lŏn tơnah, dưi pơhno hăng bruă ngă bơkơnar amăng anih anom sĭ mơdrô ƀơi jar kmar.