Anai lĕ tal hyu mă bruă pơ tač rơngiao blung a mơng Khua mir sir ơi Lương Cường dong mơng hrơi đĭ ngă khua, tơlơi anai yôm phăn biă mă hăng dua bơnah laih dong djop bơnah. Tal nao čuă amra pơgôp tŏ tui hơkrŭ tơlơi rô nao rai gru gru, kơtưn pran đăo gơnang kơđi čar, tŭ mă klă hloh hơdôm tơlơi gal ngă hrŏm, pơtrut tơlơi rô nao rai Việt Nam hăng Chile laih dong Peru kah hăng amăng kual Mỹ Latinh.

Hrŏm hăng anun, bruă Khua mir sir nao jơnum rơwang hrơi tơjuh jơnum khua mua APEC 2024, lăp djơ̆ tal hơdor glăi 35 thun akŏ pơjing khul anai, tŏ tui pơsit tong tơlơi gum pơgôp, gơgrong mơng Việt Nam amăng pơsir hĭ hơdôm bruă amăng kual hăng rŏng lŏn tơnah, sit biă ñu lĕ pơtrut pơlir hơbit amăng bơwih ƀong huă jar kmar, pơtrut phrâo pơđĭ kyar amăng kual; tŏ tui hơkrŭ bruă mă mơng APEC lĕ khul bơwih ƀong pơprong, anih tum pơƀut 3/5 boh dêh čar pơdrong asah amăng rŏng lŏn tơnah.