Tal nao čuă gưl kơnuk kơna mơng Khua mir sir ơi Lương Cường pơ dêh čar Êjip. Pơphun amăng hrơi mông Việt Nam glăk gir run pơgiong hơdôm hơnong pơkă, bruă jao pơtom hiăp mơ̆ Jơnum Ping gah tal XIII ba tơbiă, pok pơhai lu tơlơi pơplih kơ hơdră, anih anom djru pơđĭ kyar lŏn ia, anăp nao Jơnum tal XIV mơng Ping gah Cộng sản Việt Nam; prap lui lăng glăi Akŏ bruă “Pơđĭ kyar tơlơi rô nao rai kơplah wah Việt Nam hăng hơdôm boh dêh čar kual Trung Đông-Ơi Jŭ rơwang thun 2016-2025” hăng akŏ bruă “Pơđĭ kyar tơlơi rô nao rai Việt Nam hăng Khul pơlir hơbit kual Ơi jŭ rơwang thun 2021-2025”.

Amăng hơdôm hrơi nao čuă, Khua mir sir ơi Lương Cường amra hơmâo hơdôm mông bơkơtuai gưl khua mua pơprong hăng Khua mir sir Êjip Abdel Fattah Al Sisi; bưp Khua dêh čar Mostafa Madbouly, Khua git gai pơ ala mơnuih ƀôn sang gơnong glông Abdel-Razek hăng Khua git gai pơ ala mơnuih ƀôn sang gơnong yŭ El-Gebaly; lăi pơthâo hơdră bruă ƀơi Ƀrô Khul pơlir kual Arab.