Đĭ pơhiăp git gai mông Jơnum, Khua mir sir ơi Lương Cường lăi pơtong amăng hrơi blan đơ đam dêh čar glăk ngă tui hơdôm tơlơi črâo trun, hơdră bruă yôm phăn kiăng pơđĭ kyar lŏn ia, Ding jum kông ang hơmâo ba gru amăng ngă tui tơlơi pơtrun mơng gơnong glông kơ ngă hơbot anih anom mă bruă; gum hrŏm klă hăng hơdôm anom bruă, gong gai kiăng pơhlôm hơđong, rơnuk rơnua amăng mơnuih mơnam.

Khua mir sir ơi Lương Cường rơkâo Ding jum kông ang kiăo tui lăng tơlơi sit nik, hmao tlôn ba tơbiă hơdôm hơdră bruă lăp djơ̆, pơsir hĭ tañ, mơng ataih hơdôm tơlơi pơčut pơčao ngă rung răng hăng hơdôm bruă ngă glêh tơnap phrâo ƀuh; đing nao pel ĕp, mă pơkŏng ƀing ngă soh, ngă sat amăng mơnuih mơnam, sit biă ñu ƀing ngă soh lŏn mơnai glai čư̆, gơnam ƀong hơdjă, pơkra mă gơnam ča čot, gơnam sat răm, ƀing sĭ dŏp hŏt ma tuý hăng ƀing plư pleč amăng internet, pơhlôm brơi ngă djơ̆ hrơi mông hơdôm bruă jao pơjing anih djă pioh tơlơi pơhing dêh čar, anăm brơi pơđut jang jai, ngă gun hĭ bruă mă, anăm lui ruh, anăm brơi guang dar lui kual hơmâo ƀing ngă soh.