Khua mir sir ơi Lương Cường lăng yôm boh than bơkơtuai kơplah wah Ding jum ling tơhan Việt Nam, kơ-iăng khua git gai Ping gah ling tơhan ơi Phan Văn Giang hăng Kơ-iăng khua git gai Ping gah ling tơhan dêh čar Khač ơi Trương Hựu Hiệp, hok mơ-ak lơm ƀuh tơlơi rô nao rai dua bơnah tŏ tui hơmâo tơlơi yak nao pơđĭ kyar phrâo, ba glăi tŭ yua, lăp djơ̆ hăng hră pơ-ar hơmâo kĭ hăng tơlơi pơkôl kơplah wah khua mua pơprong mơng dua Ping gah, dua kơnuk kơna.

Khua mir sir dêh čar ta rơkâo pơ anăp anai Ping gah ling tơhan, Ding jum ling tơhan dua bơnah tŏ tui pơtrut, ngă dơlăm tui tơlơi rô nao rai ngă hrŏm bruă ling tơhan dua bơnah hluai tui bruă pơlăi nao rai djop gưl, sit biă ñu ƀing khua mua pơprong; tŏ tui boh tŭ yua mơng hơdră bruă ngă hrŏm tui ră anai. Lăi rơđah thun 2025 lĕ thun Việt Nam hơdor glăi 80 thun akŏ pơjing lŏn ia hăng 70 thun akŏ pơjing tơlơi rô nao rai pơtom hiăp Việt Nam-Khač, ơi Trương Hựu Hiệp pơsit tong dua bơnah tŏ tui tơpă jơlan mơ̆ khua mua dua Ping gah, dua kơnuk kơna pơsit tong; laih dong kơtưn ngă hrŏm amăng djop mơta bruă, kiăng pơjing bơnah gum hrŏm kơñ pơgi yôm phăn.