VOV4.Jarai-Khua mir sir ơi Nguyễn Xuân Phúc phrâo mơ-it hră bơni kơ mơnuih ƀôn sang ƀing khin hơtai djru pơklaih kơ mơnuih ƀlung ia huăi djai ƀơi tơring čar Nghệ An hăng Hà Tĩnh. Khua mir sir pơdah pran jua hok mơak lơ̆m thâo ƀing arăng khin hơtai ƀuh mơnuih ƀlung ia laih anun djru hmao kru, ơi Nguyễn Hưũ Hiền, Khua khul tơhan hơđăp să Thanh Hòa, tơring glông Thanh Chương, Nghệ An hăng nô Nguyễn Văn Dương, čơđai sang hră anih 8, sang hră gưl dua Minh Lạc, tơring glông Cẩm Xuyên, tơring čar Hà Tĩnh lêng kơ khin hơtai, hmao kru kơdâo trun amăng ia djru pơklaih kơ mơnuih hlăk ƀlung ia laih anun luai hơdui ba nao pơ hang hăng bluh brơi jua pơ hơdip lu mơnuih ƀlung ia djai hơngol laih dưi hơdip glăi.

Khua mir sir ƀuh bruă ngă anai hiam, lăp bơni biă mă mơ̆ng ơi Hiền hăng nô Dương laih anun brơi pơhmu đĭ gru hiam klă, pran jua khin hơtai djru ba mơnuih mơnam amăng mông ječ ameč truh, anun jing sa gru grua hiam, tơlơi khăp prong mơ̆ng djuai ania Việt Nam, lăp pơpŭ bơni hăng pơlar tui dơ̆ng bruă ngă hiam anai.

Nay Jek: Pơblang