VOV4.Jarai-Tlam lơ 22/3, ƀơi sang bruă khua mir sir, ơi Nguyễn Xuân Phúc Khua mir sir, Khua Khul git gai akŏ pơjing kơčăo bruă “Bruă mă yôm akŏ pơdong hăng ngă giong Kơnuk kơna tơlơi dưi hăng Phiăn git gai mơnuih mơnam ngă pô Việt Nam truh thun 2030, anăp nao pơ thun 2045” hơmâo bưp ƀing mơnuih rơgơi, kơhnâo, ƀing kơhnăk, ding kơna Grup čih pơkra Kơčăo bruă yôm anai.

Mông bưp pơphun tơdơi kơ tŭ yua mơ̆ng 3 wơ̆t jơnum bơkơtuai gưl lŏn ia ƀơi 3 kual Kơdư-Tong krah-Dơnung dêh čar ta, yua kơ Khul git gai pơphun, pơtum hơmâo hơdôm rơtuh mơta tơlơi čih pơgôp hiăp mơ̆ng ƀing mơnuih rơgơi, kơhnâo, kơsem min, wai lăng, ƀing kơhnăk tơlơi phiăn kiăng čih pơkra bruă mă kơ Kơnuk kơna kơtang hăng tơlơi phiăn git gai mơnuih mơnam ngă pô xã hôị chủ nghiã Việt Nam. Pơhiăp git gai jơnum, Khua mir sir ơi Nguyễn Xuân Phúc lăng yôm biă boh tơhnal kơsem min, boh tơhnal mă bruă truh mông anai, laih dơ̆ng lăi bruă gir run pran jua, pơtrut tañ hloh bruă mă ba glăi boh tŭ yua čih pơkra hơdră tơlơi phiăn tal anai.

Nay Jek: Pơblang