VOV4.Jarai - Ƀrô tal hơdor glăi 40 thun hrơi akŏ pơjing hăng prap lui Jơnum tal IX rơwang thun 2022-2027 mơng Khul man pơdong Việt Nam, tlam lơ 5/7, ƀơi Ƀirô mă bruă, Khua mir sir ơi Nguyễn Xuân Phúc bưp ƀô̆ mơta ƀing khua mua pơ ala brơi rơbêh 7.000 čô ding kơna, khul grup, mơnuih mă bruă mơng Khul man pơdong Việt Nam. Đĭ pơhiăp amăng mông bưp, pơ ala brơi khua mua Ping gah, Kơnuk kơna, Khua mir sir lăng yôm hơdôm tơlơi gir run, pran gum pơgôp mơng Khul man pơdong amăng 40 thun amăng bruă man pơdong hăng pơđĭ kyar lŏn ia.

Khua mir sir rơkâo Khul kiăng djă pioh ngă tui gru grua 40 thun laih rơgao, ƀing mơnuih mă bruă lĕ ƀing rơgơi kơhnâo amăng lŏn ia hăng pơhưč lu mơnuih kơhnâo kơhnăk dêh čar Việt Nam dŏ hơdip pơ tač rơngiao kiăng kơ klă dong amăng bruă mă. Laih anun klă dong amăng bruă črâo ba, krăo lăng hăng lăi glăi tơlơi rơkâo mơng mơnuih mơnam amăng man pơdong; pơphô bruă kơ Ping gah hăng Kơnuk kơna hơdôm bruă akŏ phun amăng pơđĭ kyar bơdjơ̆ nao man pơdong sang dŏ, plơi prong, kual tuh tia pơkra pơjing, anih anom bơwih ƀong huă-mơnuih mơnam, hơdôm bruă bơdjơ̆ nao dưm dăp man pơdong tui gru grua dêh čar Việt Nam.

Siu Đoan: Pơblang