VOV4.Jarai - Tom brơi (11/5), ƀơi ƀon prong Hồ Chí Minh, Khua mir sir Nguyễn Xuân Phúc hrŏm hăng Khul khua pơ ala mơnuih ƀon sang ƀon prong Hồ Chí Minh bưp mơnuih ƀon sang ruah khua ƀơi ƀon prong ƀơi hơdôm boh tơring glông Củ Chi, Hóc Môn, plơi prong Thủ Đức lăng nao rai amăng tivi hăng jơnum bưp ƀơi anăp. Pơhiăp ƀơi mông jơnum, khua mir sir ơi Nguyễn Xuân Phúc lăng yôm mơnuih ƀon sang ƀon prong Hồ Chí Minh hơmâo lăi nao lu bruă bơdjơ̆ nao tơlơi đĭ kyar mơng ƀon prong wơ̆t hăng amăng đơ đam dêh čar. Ƀơi mông jơnum, Khua mir sir kiăng khua mua hơdôm tơring čar hăng ƀon prong Hồ Chí Minh lăi glăi hơdôm tơlơi mơ̆ mơnuih ƀon sang ba tơbiă, laih dong hơmâo mông ngă bruă tŏ tui lăi glăi tơlơi tơña rơđah hloh kơ hơdôm bruă aka ƀu dưi ngă.

Mơnuih ƀon sang lăng yôm kơ khul khua pơ ala mơnuih ƀon sang ƀon prong Hồ Chí Minh hơmâo lu bruă ngă rơđha, pơhmư̆ tơlơi pơgôp hiăp mơng mơnuih ƀon sang ƀon prong prăp lui mông jơnum hlâo hrơi jơnum lok 3 mơng Ƀirô khua git gai pơ ala mơnuih ƀon sang tal 15. Hăng hơdôm bruă prong, ƀing kư tri lăng nao boh than dưi ngă mơng mông Jơnum khua apăn bruă Ping gah lok 5 tal 13, amăng anun, hơmâo bruă lŏn tơnah, pơtrut pơgang pơgăn hưp ham ƀong kông ngăn ƀu pơgao lui pô hlơi ôh.

Siu H’Mai: Pơblang