VOV4.Jarai-Ƀrô hơdor glăi tal 77 thun Hrơi hơkrŭ blan čơpăn hăng Hrơi akŏ pơdong kơnuk kơna lŏn ia lơ 2/9, 53 thun hrơi Wa Hồ rơngiă, ăt amăng hơdră nao čuă jơmư hăng mă bruă pơ tơring čar Tuyên Quang, mơguah lơ 4/9, Khua mir sir ơi Nguyễn Xuân Phúc ba jơlan hlâo grup khua mua hyu mă bruă, nao čuh ñang h’ŭ, pŭ bơnga pơyơr pơ anih hơdor kơ Khua mir sir Hồ Chí Minh ƀơi sang hlang Nà Nưa, amăng anih dêh čar ta djă pioh yôm phara Tân Trào. Ƀơi anăp rup trah hơdor glăi kơ Khua mir sir Hồ Chí Minh, Khua mir sir ơi Nguyễn Xuân Phúc hăng grup pioh sa tơnit h’ŭ hơdor glăi. Khua mir sir pơdah pran jua hơdor bơni prong prin kơ bruă mă, tuh rơyuh  pran jua ia hơtai mơ̆ng Wa Hồ, sa čô khua rơgơi hing ang, sa čô nai pơtô prin tha amăng bruă hơkrŭ dêh čar, kiăng kơ lŏn ta rơngai glai ta mơak, ană plơi pla rơngai.

Khua mir sir ơi Nguyễn Xuân Phúc čuh ñang hơdor kơ Khua mir sir Hồ Chí Minh ƀơi Sang hlang

Nà Lừa, anih gru grua dêh čar djă pioh phara či Tân Trào

Tơdơi kơ anun, Khua mir sir ơi Nguyễn Xuân Phúc hăng grup hyu mă bruă nao čuh ñang pơ pra yang Tân Trào, gah yŭ plơi Tân Lập, să Tân Trào, jing anih khua mua pơ ala mơnuih ƀôn sang jơnum ruah khua, anih akŏ pơjing rai anom bruă khua pơ ala mơnuih ƀôn sang Việt Nam, lơ 16/8/1945. Quốc dân Đại hội Tân Trào lĕ jơnum ruah khua lăp hơdor pioh amăng bruă hơkrŭ Việt Nam, pơphun tơgŭ blah sua glăi kơnuk kơna pơlir jing sa, tañ hloh mă bruă, pioh kơ mơnuih ƀôn sang lŏn ia dêh čar ta tơgŭ blah ayăt rơngai, ngă khua pô kơ lŏn ia ta.

Khua mir sir ơi Nguyễn Xuân Phúc čang rơmang ƀing ding kơna grup adoh đưm djă pioh na nao hăng pơđĭ tui yôm phara

mơ̆ng tơlơi adoh Then

Ƀơi sang gru grua plơi Tân Lập, să Tân Trào, Khua mir sir ơi Nguyễn Xuân Phúc ăt nao tơña bla, pơtrut pran jua hơdôm ding kơna grup adoh Then plơi Tân Lập să Tân Trào tơring glông Sơn Dương. Khua mir sir čang rơmang rĭm kơ ding kơna grup adoh suang anun dưi gơgrong ba bruă mă djă pioh hăng pơđĭ tui rơnoh yôm phara mơ̆ng bruă mă adoh Then, gru grua yôm amăng pran jua mơ̆ng ană mơnuih dưi hơmâo UNESCO čih pioh hăng pơpŭ bơni.

Nay Jek: Pơblang