VOV4.Jarai - Ƀơi anăp kơ tơlơi blah ngă ƀơi Ukraine, bruă pơgang brơi mơnuih ƀon sang Việt Nam pơ Ukraine hơmâo Khua mua Ping gah, Kơnuk kơna đing nao. Tlam lơ 6/3, ƀơi Ƀirô mă bruă, Khua mir sir ơi Nguyễn Xuân Phúc hmư̆ Ding jum pơtom hiăp hăng hơdôm anom bruă bơdjơ̆ nao lăi pơthâo kơ bruă anai. Tui hăng tơlơi pơhing mơng Ding jum pơtom hiăp, ră anai, ƀơi Ukraine hơmâo 7.000 čô mơnuih ƀon sang Việt Nam. Lu mơnuih hơmâo tơbiă đuăi mơng kual glăk blah ngă nao hơđăp pơ kual pơhlôm rơnuk rơnua ƀơi hơdôm dêh čar ieo gah anun lĕ Ba Lan, Hungary, Bulgary. Ding jum pơtom hiăp hơmâo mông mă bruă hăng hơdôm anom bruă bơdjơ̆ nao ƀơi Nga hăng Ukraine, Sang gum hơbit djop dêh čar hăng hơdôm dêh čar mơ̆ mơnuih ƀon sang Việt Nam glăk đuăi nao hơđăp kiăng pơhlôm rơnuk rơnua kah hăng djru brơi ƀơi hơdôm anih nao hơđăp gơnam ƀong huă. Amăng mông mă bruă, khua mir sir lăi pơtong, khŏm ngă klă bruă pơgang brơi mơnuih ƀon sang, anăm brơi mơnuih ƀon sang Việt Nam djai ƀudah rơka rơkač ƀơi Ukraine. Khua mir sir hok mơ-ak kơ yua Kơnuk kơna ta hơmâo ba nao rơdêh por pơgiăng glăi ƀing mơnuih tơnap tap hăng ƀing kiăng glăi pơ dêh čar; laih dong ñu rơkâo bruă anai kiăng kơ pơphun brơi djơ̆, đing nao ƀing đah kơmơi, ƀing čơđai, mơnuih tha rơma.

Siu Đoan: Pơblang