VOV4.Jarai - Mơguah lơ 20/6, ƀơi tơring čar Bình Dương, Khua mir sir ơi Nguyễn Xuân Phúc, Khua Khul git gai pơjing akŏ bruă “Hơdră pơjing hăng pơgiong Kơnuk kơna tui phiah phiăn Xã hội chủ nghĩa Việt Nam truh thun 2030, anăp nao truh thun 2045” git gai Jơnum mă tơlơi pơgôp hiăp mơng Ping gah tơring čar, Ping gah ƀôn prong hơdôm kual Dơnung amăng čră akŏ bruă. Hơdôm Ping gah tơring čar, ƀôn prong kual Dơnong pơgôp amăng akŏ bruă kiăng pơgiong hơdôm hơdră pơpha, jao bruă kơplah wah gơnong bruă hăng ƀon lan brơi kjăp, tong ten ƀiă dong.

Đĭ pơhiăp amăng mông jơnum, Khua mir sir ơi Nguyễn Xuân Phúc lăng hơdôm tơlơi pơgôp hiăp mơng Ping gah tơring čar, ƀôn prong lĕ tơpă sit, tong ten, djơ̆ hăng tơlơi sit nik hăng hơdôm lu tơlơi pơplih phrâo. Khua mir sir lăi pơtong tơdơi kơ 3 tal jơnum pơgôp hiăp ƀơi 63 boh tơring čar, ƀôn prong, ƀing ta ƀuh bruă pơjing hăng pơgiong kơnuk kơna phiah phiăn Việt Nam xã hội chủ nghĩa lĕ kiăng hloh, lĕ akŏ phun amăng pơplih phrâo bruă kơđi čar mơ̆ Jơnum Ping gah tal XIII hơmâo pơsit tong.

Siu Đoan: Pơblang