VOV4.Jarai - Tlam lơ 21/6, Khua mir sir ơi Nguyễn Xuân Phúc hrŏm hăng Khua pơ ala mơnuih ƀon sang ƀôn prong Hồ Chí Minh bưp kư tri lĕ Jơnum min djop djuai ania mơnuih mơnam Việt Nam ƀôn prong, ƀing rơgơi kơhnâo, ƀing kŏm drơi jăn tui tơlơi đăo, ƀing mơnuih arăng đăo gơnang, ƀing ba gru amăng kual mơnuih djuai ania ƀiă, ƀing thâo adôh suang ƀơi ƀôn prong Hồ Chí Minh. Hmư̆ tơlơi pơgôp hiăp mơng kư tri, Khua mir sir ơi Nguyễn Xuân Phúc lăng abih bang lêng kơ rơkâo đĭ lu bruă yôm phun amăng ƀôn prong Hồ Chí Minh hăng amăng lŏn ia, wŏt bruă amăng tơlơi đăo, pơtô pơjuăt, bơwih ƀong huă, gru grua, ayuh hyiăng, pơgăn hưp ƀong kông ngăn …Lăng yôm hơdôm tơlơi pơgôp hiăp abih pran jua mơng mơnuih ƀon sang, Khua mir sir ơi Nguyễn Xuân Phúc lăi rơđah, hơnong pơkă truh thun 2045 ba dêh čar ta jing dêh čar pơđĭ kyar, hơmâo prăk pơhrui lu, anai lĕ kiăng gơgrong kơtang hloh, kiăng gum tơngan hrŏm, gum pơgôp mơng abih bang mơnuih, mơng ƀing rơgơi kơhnâo, ƀing thâo čih boh pia, tơlơi adôh suang, ƀing kŏm drơi jăn tui tơlơi đăo kah hăng djop djuai ania dêh čar Việt Nam. Khua mir sir lăi pơtong, rĭm wŏt dêh čar ta bưp tơnap tap, tơlơi gum pơgôp mơng ƀing rơgơi kơhnâo lĕ yôm hloh.

Siu Đoan: Pơblang