VOV4.Jarai-Mơguah lơ 15/6, Khua mir sir ơi Nguyễn Xuân Phúc git gai jơnum mă bruă hăng khua mua phun ping gah tơring čar Quảng Bình. Tơdơi kơ hmư̆ khua mua tơring čar lăi pơthâo laih anun hơdôm ding jum, anom bruă pơgôp hiăp, pơhiăp git gai jơnum mă bruă, Khua mir sir ơi Nguyễn Xuân Phúc lăng yôm, thun blan rơgao, Ping gah, gong gai kơnuk kơna hăng mơnuih ƀôn sang tơring čar hơmâo djă bong kjăp gru grua hiam tơlơi gum pơgôp, ngă tui djơ̆ Hră pơtrun mơ̆ng jơnum ruah khua ping gah tơring čar tal XVII, khut khăt ba tơring čar yak nao amăng bruă mă tum teč hloh. Quảng Bình hơmâo lu tơlơi gêh găl pơđĭ kyar kah hăng pơkra tơdron rơdêh por, tơdrun kompăn, hơmâo anih anom lŏn tơnah hiam hmư̆ hing rŏng lŏn tơnah, hơmâo jơlan guai dêh čar, kiăng lăng nao pơ anăp adih pơđĭ kyar.

Khua mir sir ơi Nguyễn Xuân Phúc mă bruă hăng khua mua ping gah Quảng Bình

Amăng hơdră pơđĭ kyar abih bang, Khua mir sir ơi Nguyễn Xuân Phúc lăi lĕ, tơring čar ăt pơtum nao kơ 4 tơmeh phun pơhmu bruă mă kah hăng bruă tuai čuă ngui, bruă ngă hmua rơgơi, pơtrut tuh tia pơkra ming hăng pơđĭ kyar bơwih ƀong huă hơđong kjăp mơ̆ng ia rơsĭ. Amăng anun, khom đing nao hloh mơnuih ƀôn sang amăng tơring čar hơdip mơda lu amăng anih ngă hmua, kual plơi pla.

Nay Jek: Pơblang