VOV4.Jarai-Tlam lơ 16/2, Khua mir sir ơi Nguyễn Xuân Phúc nao čuă, ƀơk gơnam hăng ră ruai hrom khua mua, mơnuih mă bruă ƀơi Kông ty pơčruh ngăn hrong ia jâo Bình Sơn Quảng Ngãi. Hok mơak nao čuă glăi sang măi hrong ia jâo ring bruă mơ̆ng Sang măi hrong ia jâo Dung Quất, ƀuh boh tơhnal sĭ mơdrô mơ̆ng kông ty Bình Sơn lăp bơni biă mă, Khua mir sir hok mơak bơni kơ mơnuih mă bruă ƀơi Bình Sơn ƀu pơdơi ôh ngă giong gru grua hiam mă bruă mơ̆ng kông ty, yua ngă tui djơ̆ lăp tơlơi pơtrun, tơpă, pơhaih tong ten.

Khua mir sir oi Nguyễn Xuân Phúc nao čuă, ƀơk gơnam kơ mơnuih mă bruă kông ty hrong ia jâo Bình Sơn

Yua kơ anun, prăk pơhrui glăi mơ̆ng kông ty đĭ rơbêh 44%, lu biă mă mrô rơnoh duh jia laih anun pơblih phrâo kơtang mă bruă tŭ yua prong. Khua mir sir ăt rơkâo khua mua tơring čar Quảng Ngãi đing nao, ngă gêh găl lu hloh, hơmâo jơlan hơdră djơ̆ lăp pioh pơsir tơlơi hơđong bơwih ƀong huă hơdip mơda kơ ƀing mă bruă apah mơ̆ng kông ty Bình Sơn.

Nay Jek: Poblang