VOV4.Jarai - Mơguah lơ 29/3, Khua mir sir ơi Nguyễn Xuân Phúc hăng grup hyu mă bruă hơmâo nao pel ĕp sa, dua hơbô̆ bruă ngă hrŏm bơwih ƀong huă, anom bơwih ƀong hrŏm ba glăi tŭ yua amăng ngă hmua ƀơi plơi prong Sa Đéc hăng tơring glông Tháp Mười, tơring čar Đồng Tháp. Tơdơi kơ hmư̆ lăi pơthâo, Khua mir sir ơi Nguyễn Xuân Phúc lăng yôm hơdôm hơbô̆ bruă ngă hrŏm bơwih ƀong huă amăng ngă hmua, pơđĭ kyar ngă hmua pơlir hăng bơwih brơi tuai čuă ngui, hơmâo gơnam ba sĭ mơdrô pơ tač rơngiao, ba glăi tŭ yua prong prin.

Khua mir sir ơi Nguyễn Xuân Phúc nao čuă anom bơwih ƀong hrŏm gah ngă hmua Mỹ Đông 2

Nao čuă hơbô̆ bruă bơwih ƀong hrŏm gah ngă hmua Mỹ Đông 2 ƀơi tơring glông Tháp Mười, Khua mir sir ơi Nguyễn Xuân Phúc lăng yôm anom bơwih ƀong hrŏm hơmâo hơbô̆ bruă ba glăi tŭ yua, biă mă ñu lĕ khin hơtai mă yua boh thâo măi mok amăng ngă hmua pla pơjing, thâo pơkrem, wai pơgang jum dar hăng klă hloh amăng pla pơjing, anom bơwih ƀong hrŏm hơmâo ngă klă mơng pla pơjing truh pơ ba sĭ mơdrô, pơtrut pơlir hơbit hăng anom bơwih ƀong sĭ mơdrô kiăng kơ braih pơdai hiam hơdjă tui hơnong pơkă ba sĭ mơdrô. Khua mir sir brơi thâo, anai lĕ hơbô̆ bruă ba glăi tŭ yua mơ̆ tơring glông Tháp Mười hăng tơring čar Đồng Tháp kiăng pok prong.

Siu Đoan: Pơblang