VOV4.Jarai - Lơ 12/4, Khua mir sir ơi Nguyễn Xuân Phúc nao jơnum pơsur tuh pơ alin ƀơi 2 boh tơring glông Hóc Môn hăng Củ Chi, ƀôn prong Hồ Chí Minh. Anai lĕ jơnum pơsur tuh pơ alin prong hloh amăng dêh čar ta hăng 550 čô khua mua nao jơnum, lu hloh lĕ anom bơwih ƀong sĭ mơdrô. Amăng mông jơnum, dua boh tơring glông Củ Chí hăng Hóc Môn hơmâo lăi pơthâo hơdôm tơlơi dưi pơđĭ kyar, hơdôm tơlơi gal phara hăng iâu pơthưr tuh pơ alin amăng 55 ring bruă hăng abih tih rơnoh prăk tuh pơ alin rơbêh 285 rơbâo klai prăk amăng man pơkra jơlan glông, man pơkra anih anom, sang măi tuh tia pơkra pơjing, ngă hmua, sĭ mơdrô.

Lu anom bruă tuh pơ alin arăng jao hră tuh pơ alin amăng mông Jơnum

Đĭ pơhiăp amăng mông jơnum, hok mơ-ak hăng hơdôm anom bơwih ƀong sĭ mơdrô ƀuăn tuh pơ alin ƀơi Củ Chi hăng Hóc Môn, Khua mir sir ơi Nguyễn Xuân Phúc lăi pơtong, anai lĕ hơdôm tơring glông hơmâo lu tơlơi dưi pơđĭ kyar, kual giăm hăng Long An, Bình Dương, dưi tô nao rai hăng ia krông hăng anăp nao Sài Gòn. Khua mir sir ơi Nguyễn Xuân Phúc rơkâo djop anom bruă tuh pơ alin tơdah lăi hiưm pă amra ngă tui anun, tañ pok pơhai akŏ bruă hăng anăm ngă soh, hưp ƀong kông ngăn. Hrŏm hăng anun lĕ ƀuăn wai pơgang ayuh hyiăng, tơlơi gơgrong hăng mơnuih mơnam, pơgôp djă pioh hăng lăi pơthâo gru grua yôm.

Siu Đoan: Pơblang