VOV4.Jarai - Mơmŏt lơ 19/8, Ping gah hăng mơnuih ƀon sang tơring glông Quế Sơn, tơring čar Quảng Nam pơphun yôm phăn mông ngă lơphet hơdor glăi 50 thun blah dưi Cấm Dơi. Nao ngă lơphet hơmâo Khua mir sir ơi Nguyễn Xuân Phúc, khua mua tơring čar Quảng Nam, quân khu 5, tơring glông Quế Sơn hăng ƀing amĭ Việt Nam sông kơtang, ling tơhan sông kơtang, ƀing khua tơhan, ling tơhan hơđăp, ƀing sang anŏ mơnuih djru ngă hơkrŭ hăng abih bang mơnuih ƀon sang tơring glông Quế Sơn.

Khua mir sir ơi Nguyễn Xuân Phúc hrŏm hăng grup hyu mă bruă nao tŭi ñang, dưm guang bơnga ƀơi Pra yang pioh hơdor tơhan djai pơsăn drơi tơring glông Quế Sơn

Sui mơng anai 50 thun, hrŏm hăng pran gơgrong ngă hơkrŭ mơng ling tơhan hăngmơnuih ƀon  sang kual Dơnung, tui tơlơi git gai mơng Ping gah, biă ñu mă ñu lĕ Ping gah kual 5 hăng Ping gah tơring čar Quảng Nam, ling tơhan kual 5 hăng tơhan amăng ƀon lan hrŏm hăng ƀing apăn bruă, ling tơhan Sư đoàn 711, Tiểu đoàn gah Quân Khu 5, sông kơtang gơgrong blah ngă ba glăi tơlơi dưi - anăp nao blah  pơkiăo đuăi ayăt ƀơi Cấm Dơi, pơklaih rơngai tơring glông Quế Sơn, mơng anun anăp nao pơklaih rơgao tơring čar Quảng Nam. Ngă tui gru grua sông kơtang mơng rơnuk blat ayăt, hơdôm thun laih rơgao, Ping gah tơring glông Quế Sơn hơmâo git gai ba glăi lu tơlơi dưi yôm phăn. Rơnoh pơđĭ kyar bơwih ƀong huă hăng hơđong, pơplih bơwih ƀong huă tui jơlan phrâo.

Siu Đoan: Pơblang