VOV4.Jarai - Amăng bơyan akŏ thun phrâo, mơguah lơ 7/2, lĕ hrơi tal 7 thun phrâo Nhâm Dần, Khua mir sir dêh čar ta ơi Nguyễn Xuân Phúc nao ngă yang Tịch điền ƀơi să Tiên Sơn, plơi prong Duy Tiên, Hà Nam. Amăng mông ngă yang Tịch điền Đọi Sơn thun 2022, Khua mir sir lăi pơtong, amăng thun blan ayuh hyiăng pơplih sat, klin kheng lar hyu, biă mă ñu lĕ klin Covid-19 amăng thun 2021 laih rơgao, mơnuih ngă hmua, djop plơi pla amăng đơ đam dêh čar sa wŏt dong pơhlôm djop gơnam ƀong huă, ngă hơđong tơlơi hơdip kơ mơnuih ƀon sang dêh čar Việt Nam.

Khua mir sir ơi Nguyễn Xuân Phúc tŭi ñang pơpŭ kơ yang wai lăng đang hmua hăng ơi pơtao Lê Đại Hành ƀơi mông ngă yang Tịch điền

Laih dong Khua mir sir ơi Nguyễn Xuân Phúc, khua mua Ping gah, kơnuk kơna, tơring čar Hà Nam nao tŭi ñang pơpŭ kơ Yang wai lăng đang hmua hăng ơi pơtao Lê Đại Hành. Thun 2022 ăt lĕ ƀrô tal hơdor glăi 1035 thun (987-2022) ơi pơtao Lê Đại Hành čoh ngă hmua pơdai ia Tịch điền, akŏ pơjing hrơi ngă yang pioh glăi truh ră anai.

Siu Đoan: Pơblang