VOV4.Jarai - Khua mir sir dêh čar ta ơi Nguyễn Xuân Phúc phrâo nao pơhmư̆ jơlan hơdră “Pơđao pran jua bơyan bơnga – thun 2022” ƀơi plơi prong Thủ Đức, ƀôn prong Hồ Chí Minh. Khua mir sir dêh čar ta ơi Nguyễn Xuân Phúc hrom hăng grŭp hyu mă bruă hmâo ƀơk laih 900 anung gơnam tam hơ-ư̆č hmưi thun phrâo kơ ƀing hlăk ai drit druai yua kơ klin Covid-19, khul ơi nai ia jrao, mơnuih apăn bruă phường, kual plơi prong gum hrom pơgang pơgăn klin hăng mơnuih mă bruă ƀơi plơi prong Thủ Đức.

Khul mut phung dêh čar Việt Nam hăng sa dua bôh anom bơwih ƀong ăt hmâo mơn hơdôm anung gơnam thun phrâo mơ-ĭt truh ƀing čơđai muai hăng khul mơnuih mă bruă. Pơhiăp amăng jơlan hơdră, Khua mir sir dêh čar ta ơi Nguyễn Xuân Phúc pơsit yôm bruă ƀôn prong Hồ Chí Minh gơgrong hlâo, pơčeh phrâo, hmâo lu jơlan hơdră bơwih brơi Tết kơ mơnuih ƀun rin, mơnuih hmâo tơlơi hơdip tơnap ƀơi plơi prong hăng prăk prăk mă yua lu. Hrom hăng anun čang rơmang, tơdơi kơ tal pơdơi Tết, khul mơnuih mă bruă amăng ƀôn prong Hồ Chí Minh hur har bơkơtưn, mă bruă bơwih ƀong huă./.

Siu H’ Prăk: Pơblang