VOV4.Jarai - Mơmŏt lơ 30/6, ƀơi tơring glông Ba Tri, tơring čar Bến Tre pơphun mông ngă lơphet hơdor glăi 200 thun hrơi tơkeng mơnuih kơhnâo kơhnăk ơi Nguyễn Đình Chiểu; 30 thun hrơi gru grua tơring čar Biến Tre. Nao ngă lơphet hăng đĭ pơhiăp, Khua mir sir ơi Nguyễn Xuân Phúc lăi rơđah, ơi Nguyễn Đình Chiểu găn rơgao lu tơlơi lông, tơnap tap amăng tơlơi hơdip, jing nai ia jrao thâo rơgơi, sa čô nai pơtô abih pran jua amăng bruă mă, lĕ sa čô mơnuih čih boh pia ba jơlan hlâo amăng bruă bơkơdong glăi ayăt.

Khua mir sir ơi Nguyễn Xuân Phúc đĭ pơhiăp amăng mông ngă lơphet

Khua mir sir dêh čar hok mơ-ak ƀuh tơlơi pơplih phrâo, pơđĭ kyar prong hloh amăng bơwih ƀong mơnuih mơnam, sit biă ñu amăng thun blan giăm anai Ping gah Bến Tre hơmâo lu tơlơi gir run găn rơgao tơnap tap, pơhưč tuh pơ alin pơđĭ kyar, lu ring bruă, akŏ bruă glăk tuh pơ alin man pơkra anun lĕ tơdrông Rạch Miễu 2, ring bruă apui lơtrik mơng angĭn …; lu bruă mă phrâo pơphun amăng bơwih ƀong amăng plơi pla Đồ Chiểu, pơgôp prong prin amăng pơđĭ kyar lŏn ia ta.

Siu Đoan: Pơblang