VOV4.Jarai - Mơguah lơ 18/1, amăng jơlan hơdră bruă mă ƀơi An Giang, Khua mir sir ơi Nguyễn Xuân Phúc nao tŭi ñang hơ-ŭ ƀơi Anih djă pioh gru grua hơđăp kơ Khua mir sir ơi Tôn Đức Thắng ƀơi Mỹ Hòa Hưng, plơi prong Long Xuyên. Khua mir sir ơi Nguyễn Xuân Phúc hăng grup hyu mă bruă hơmâo nao tŭi ñang, dưm guang bơnga hơ-ŭ kơ Khua mir sir ơi Tôn Đức Thắng, sa amăng tơhan blung a amăng tal ngă hơkrŭ mơng kông nhơn hăng tal ngă hơkrŭ vô sản Việt Nam, mơnuih tuh rơyuh pran jua djru ngă hơkrŭ pơklaih rơngai lŏn ia tui hơdră xã hội chủ nghĩa. Khua mir sir ơi Tôn Đức Thắng (1888-1980) lĕ Khua mir sir tal dua kơ dêh čar Cộng hoà xã hội chủ nghĩa Việt Nam. Khua mir sir Hồ Chí Minh hơmâo pơpŭ ñu lĕ mơnuih ba gru ngă hơkrŭ, hơdip tơpă sit, abih pran jua djru ngă hơkrŭ, djru brơi mơnuih ƀon sang.

Siu Đoan: Pơblang