VOV4.Jarai - Ƀrô djơ̆ tal hơdor glăi 92 thun Hrơi pơdŏng Ping gah hăng prăp lui čơkă Tết tui phiăn juăt Nhâm Dần 2022, tui phiăn juăt mơng djuai ania, Khua mir sir dêh čar ta ơi Nguyễn Xuân Phúc hmâo nao tuĭ ñang hơdor glăi kơ ƀing khua mua git gai Ping gah hăng Kơnuk kơna rơngiă laih. Čơtlăm lơ 25/1, Khua mir sir dêh čar ta ơi Nguyễn Xuân Phúc hmâo nao tuĭ ñang hơdor glăi rơgom ơi Nguyễn Đức Cảnh ƀrô djơ̆ tal prăp lui hơdor glăi 114 thun Hrơi tơkeng mơng ñu (1908-2022) ƀơi Sang hơdor glăi ơi Nguyễn Đức Cảnh, ƀôn prong Hải Phòng.

Ăt amăng tal anai mơn, Khua mir sir dêh čar ta ơi Nguyễn Xuân Phúc hmâo nao tuĭ ñang Đại tướng Võ Nguyên Giáp – Pô ling tơhan hơkrŭ ha pran jua, čơđai sang hră rơgơi hăng jê̆ giăm mơng Khua mir sir Hồ Chí Minh; Khua pơtrun bruă tơhan hăng pô Đại tướng blung a mơng Khul ling tơhan dêh čar Việt Nam. Khua mir sir dêh čar ta ơi Nguyễn Xuân Phúc hmâo tuĭ ñang kơ rơgom ơi Trần Đại Quang, Khua mir sir dêh čar, Khua Khul pơgang lŏn ia hăng rơnuk rơnua plơi pla, Khua Grŭp črâo ba pơplih pơkra tơlơi phiăn dêh čar ta mơng thun 2016-2018./.

Siu H’ Prăk: Pơblang