VOV4.Jarai - Tŏ tui jơlan hơdră ngă bruă ƀơi Quảng Ngãi, Khua mir sir dêh čar ơi Nguyễn Xuân Phúc hơmâo mông ngă bruă hăng Khua mua apăn bruă git gai Ping gah tơring čar Quảng Ngãi. Pơhiăp ƀơi mông ngă bruă, Khua mir sir ơi Nguyễn Xuân Phúc lăi, amăng mông tơnap tap tui hăng thun phrâo rơgao, samơ̆ gong gai hăng mơnuih ƀon sang tơring Quãng Ngãi ăt gum pơgôp, ngă hrŏm hơdôm tơlơi pơtrun pơđĭ kyar bơwih ƀong huă - mơnuih mơnam; pơsir lu tơlơi ngă gun, ĕp hơdră ngă bruă, hơbô̆ bruă pơđĭ kyar bơwih ƀong hăng hơmâo tŭ yua. Hơdôm tơlơi dưi ngă amăng thun 2021 jing phun akha pơđĭ kyar yôm hăng Quảng Ngãi amăng hrơi blan pơ anăp.

Amăng hrơi mông pơ anăp, Khua mir sir rơkâo Ping gah, gong gai hăng mơnuih ƀon sang tơring Quảng Ngãi pơtrut tui gru grua hơkrŭ lŏn ia, mă abih tơlơi gêh gal mơng dêh čar Việt Nam pioh pơđĭ kyar. Tơring čar kiăng lăng glăi abih bang hăng anŏ klă, tơlơi gơñăm nao truh pơ thun 2050, Kual bơwih ƀong Dung Quất Quảng Ngãi gum pơgôp pơđĭ kyar bơwih ƀong huă hơđong kơjăp.

Siu H’Mai: Pơblang