VOV4.Jarai - Tlam lơ 23/3, ƀơi sang bruă Khua mir sir, Khua mir sir ơi Nguyễn Xuân Phúc hơmâo iâu telephôn hăng Khua mir sir phrâo dêh čar Hàn Quốc Yoon Suk-yeol. Pơ ala kơ Kơnuk kơna hăng Mơnuih ƀon sang Việt Nam, Khua mir sir ơi Nguyễn Xuân Phúc bơni hơ-ơč kơ ơi Yoon Suk-yeol hơmâo ruah ngă Khua mir sir tal 20 mơng dêh čar Đại Hàn Dân Quốc; laih dong lăi glăi tơlơi tơña bla mơng Khua git gai Ping gah Nguyễn Phú Trọng hăng ƀing khua dêh čar Việt Nam kơ Khua mir sir phrâo Yoon Suk-yeol. Khua mir sir phrâo Yoon Suk-yeol pơsit lêng lăng yôm tơlơi ngă hrŏm hăng Việt Nam laih anun čang rơmang dua bơnah pơtrut tui dong tơlơi rô nao rai amăng hrơi blan pơ anăp.

Khua mua dua dêh čar tŭ ư amăng hrơi blan pơ anăp anai amra djă bong na nao bruă jơnum pơbưp khua mua prong, djŏp gưl hăng lu hơdră jơnum lăp djơ̆; dong yua bruă ngă hrŏm wai lăng rơnuk rơnua, ling tơhan hăng boh thâo pơkra gơnam gah ling tơhan; ngă hrŏm kơjăp pok pơhai ngă lơphet 30 thun akŏ pơjing tơlơi rô nao rai Việt Nam - Hàn Quốc (1992-2022).

Siu H’Mai: Pơblang