VOV4.Jarai - Ƀơi sang bruă khua mir sir, Khua mir sir ơi Nguyễn Xuân Phúc phrâo tŭ jum Khua anih jưh pơ ala Ukraine, Gaman Oleksandr hăng Khua anih jưh pơ ala Canada Shawn Perry Steil pơdah hră mơ-it mơng Kơnuk kơna. Khua mir sir ơi Nguyễn Xuân Phúc lăi, Việt Nam lêng lăng yôm tơlơi rô nao rai mơ-ak, ngă hrŏm amăng abih bang bruă hăng Ukraine. Khua anih jưh pơ ala Ukraine bơni biă kơ Khua mir sir Nguyễn Xuân Phúc pioh mông čơkă hăng bơni kơ Việt Nam dong yua, gum djru, ngă bruă khăp pap kơ mơnuih ƀon sang Ukraine.

Khua anih jưh pơ ala Ukraine Gaman Oleksandr pơdah hră mơ-it mơng Kơnuk kơna ñu.

Amăng hrơi blan pơ anăp, Khua anih jưh amra pioh lu mông nao čuă hơdôm tơring kual pơ Việt Nam đah mơng pơtrut tui tơlơi rô nao rai dua bơnah amăng lu bruă mă. Tŭ jum Khua anih jưh pơ ala Canada ƀơi Việt Nam, Khua mir sir lăi, Việt Nam hăng Canada hơmâo tơlơi rô nao rai klă hiam, pơđĭ kyar amăng lu bruă. Mah dŏ tơnap tap yua klin Covid-19 ngă, tơlơi rô nao rai pơtom hiăp mơng dua bơnah ăt hơmâo ngă na nao mơn. Khua anih jưh pơ ala Canada pơsit, amăng rơwang bruă ñu ngă, ñu amra gir abih pran jua pơtrut tui hloh tơlơi rô nao rai dua boh dêh čar.

Siu H’Mai: Pơblang