VOV4.Jarai - Tlam lơ 9/3, ƀơi Sang bruă khua mir sir, Khua mir sir ơi Nguyễn Xuân Phúc hơmâo tŭ jum Khua anih jưh hơdôm boh dêh čar: Sierra Leone, Nepal, Guatemala, Maldives, Dominicana pơdah hră mơ-it Kơnuk kơna. Tŭ jum khua anih jưh Cộng hòa Sierra Leone, Khua mir sir dêh čar ta pơsit, Việt Nam lêng lăng yôm hăng čang rơmang pơtrut tui tơlơi ngă hrŏm hăng Sierra Leone amăng djŏp bruă: Kơđi čar, pơtom hiăp, ngă hmua, boh thâo măi mok, sĭ mơdrô. Hrŏm hăng anun lĕ pơđĭ tui bruă ngă hrŏm kơplah wah dua boh dêh čar hăng lu bruă mơng lu bơnah, amăng kual hăng ƀơi rŏng lŏn tơnah; biă ñu lĕ prăp lui hăng pơhlôm kơ hơdôm tal bơkơtuai khua mua prong dua bơnah. Tŭ jum Khua anih jưh dêh čar Nepal, Khua mir sir ơi Nguyễn Xuân Phúc lăi, Việt Nam lêng lăng yôm tơlơi rô nao rai hăng Nepal. Khua mir sir đăo gơnang Khua anih jưh amra ngă bruă abih pran jua gum pơgôp amăng tơlơi ngă hrŏm dua bơnah. Tŭ jum khua anih jưh dêh čar Cộng hòa Guatemala, Khua mir sir dêh čar ta pơsit, hơdôm ding jum, anom bruă mơng Việt Nam amra ngă gal brơi kiăng Khua anih jưh ngă truh kih bruă hơmâo jao anun lĕ pơtrut tui tơlơi rô nao rai ngă hrŏm Việt Nam hăng Guatemala.

Siu H’Mai: Pơblang