VOV4.Jarai-Ăt amăng tlam lơ 21/3/2022, ƀơi sang bruă khua mir sir, ơi Nguyễn Xuân Phúc Khua mir sir dêh čar ta hơmâo tŭ jum Khua dêh čar Malaysia ơi Dato Sri Ismail Sabri bin Yaakob ƀrô djơ̆ tal rai čuă jơmư Việt Nam. Khua mir sir ơi Nguyễn Xuân Phúc lăng yôm tal rai čuă jơmư anai kiăng pơjing pran kơtang phrâo pơtrut ngă giăng mah dua bơnah lŏn ia.

Khua mir sir bơni kơ lŏn ia Malaysia hiam phrâo; bơni hơ-ơč kơ Malaysia djă bong na nao rơnoh pơđĭ kyar GDP thun 2021 truh kơ 3,1% laih anun anăp nao či pok bah amăng čơkă tuai jar kmar mơ̆ng lơ 1/4/2022; đăo kơnang Kơnuk kơna Malaysia amra ngă tŭ yua akŏ bruă 5 thun tal 12, ba dêh čar Malaysia jing lŏn ia pơhrui glăi lu amăng thun 2025 hăng gơgrong ba, djă kjăp kơnuih jar kmar jai hrơi hmư̆ hing.

Khua mir sir ơi Nguyễn Xuân Phúc  rơkâo dua bơnah mơneč mă anŏ gêh găl mơ̆ng hră pơkôl sĭ mơdrô rơngai ngă hrom pơtrut bơwih ƀong huă, hrom hơbit amăng kual ASEAN kiăng rŭ glăi pơđĭ kyar.

Nay Jek: Pơblang