VOV4.Jarai-Tlam lơ 13/5, ƀơi anom bruă khua mir sir, Khua mir sir ơi Nguyễn Xuân Phúc tŭ jum Khua ding jum ling tơhan dêh čar Indonesia, ơi Prabowo Subianto. Khua mir sir lăng yôm boh tơhnal bơkơtuai mơ̆ng khua ding jum ling tơhan dua bơnah hăng hok mơak ƀuh tơlơi ngă giăng mah ling tơhan dua bơnah ăt pơđĭ kyar hiam klă.

Mông jơnum tŭ jum

Dua bơnah lŏn ia hơmâo hơdôm hơdră kơtưn ngă hrom pơgang tơlơi rơnuk rơnua kjăp, đăo kơnang nao rai kơđi čar; pok pơhai djop, tŭ yua, ƀuh rơđah amăng djop hră pơar  hơmâo kĭ pơkôl, kơtưn ngă hrom kơplah wah ƀing ling tơhan blah ngă, biă mă ñu brơi dua bơnah bưp nao rai ngă hrom re se gah tơhan sơlup hăng tơhan pơlih ia rơsĭ.

Khua mir sir ăt lăi, Việt Nam lăng yôm bruă ngă giăng mah hăng Indonesia, ngă hrom yôm amăng kual laih anun pơtrut ngă hrom giăng mah Indonesia kiăng pơđĭ kyar tañ, hơđong, kjăp sui thun, hlôm bôm amăng djop bruă: bơwih ƀong huă, pơgang rơnuk rơnua, pơgang lŏn ia, gru grua, tuai čuă ngui hăng bưp nao rai mơnuih ƀôn sang.

Nay Jek: Pơblang