VOV4.Jarai - Tlam lơ 8/6, ƀơi sang bruă Khua mir sir, Khua mir sir ơi Nguyễn Xuân Phúc tŭ jum Khua ding jum ling tơhan dêh čar India Rajnath Singh glăk rai čuă sit nik dêh čar Việt Nam. Ƀơi mông bưp, Khua mir sir ơi Nguyễn Xuân Phúc hok mơ-ak lơ̆m tơlơi rô nao rai bruă tơhan pơđĭ kyar klă hiam, tŭ yua, gum pơgô̆p amăng tơlơi rô nao rai dua bơnah. Tŭ ư hăng tơlơi pơgôp hiăp mơng Khua ding jum Rajnath Singh ba tơbiă, ơi Nguyễn Xuân Phúc lăi rơđah, ngă hrŏm ling tơhan hơmâo lăng jing sa gong tơmeh ngă hrŏm dua bơnah Việt Nam - India.

Amăng hrơi mông ƀơi jar kmar, amăng kual hơmâo lu tơlơi rung răng tui anai, Khua mir sir lăng yôm Ding jum ling tơhan dua boh dêh čar hơmâo akŏ pơdong tơlơi đăo gơnang kơjăp gah kơđi čar, pok pơhai ngă djŏp, tŭ yua, sit nik hơdôm hră kĭ pơkôl, hok mơ-ak dua Ding jum ling tơhan kĭ Tơlơi lăi pơthâo hrŏm jơlan đĭ kyar pơ anăp anai kơ tơlơi ngă hrŏm ling tơhan Việt Nam - India truh thun 2030.

Siu H’Mai: Pơblang