VOV4.Jarai - Tlam lơ 1/8, ƀơi Ƀrô mă bruă, Khua mir sir ơi Nguyễn Xuân Phúc tŭ jum Khua ding jum pơtom hiăp dêh čar Grek Nikolaos Dendias  ƀrô tal rai čuă sit nik dêh čar Việt Nam. Khua mir sir ơi Nguyễn Xuân Phúc hok mơ-mơk čơkă ơi Dendias tal blung a rai čuă dêh čar Việt Nam lơ̆m ñu ngă Khua ding jum pơtom hiăp Grek; laih dong, đăo gơnang tal rai čuă anai amra pơgôp prong prin kiăng pơtrut tơlơi rô nao rai ngă giang mah, gru grua hiam klă kơplah wah Việt Nam hăng Grek.

Khua mir sir ơi Nguyễn Xuân Phúc tŭ jum Khua ding jum pơtom hiăp dêh čar Grek

Khua mir sir ăt pơdah pran tơlơi pơpŭ bơni kơ Grek hơmâo djru brơi 50.000 Euro mơ̆ Grek djru brơi Jơnum min Olympic dêh čar Việt Nam hăng 250.000 rơbâo liều vaccine pơgang klin Covid-19 amăng rơnuč thun 2021. Khua mir sir brơi thâo Việt Nam lêng kơ djă pioh pran khăp hăng pơpŭ bơni tơlơi gum djru mơng dêh čar Grek brơi kơ Việt Nam amăng rơnuk blah wang pơklaih rơngai lŏn ia, kah hăng amăng rơnuk pơjing hăng pơđĭ kyar lŏn ia ră anai.

Siu Đoan: Pơblang