Hok mơak čơkă ơi Kim Sang Hwan, Khua ding jum wai lăng sang phat kơđi dêh čar Hàn Quốc hăng grup khua mua mơ̆ng Hàn Quốc rai čuă Việt Nam ƀrô djơ̆ tal dua bơnah hơdor glăi 30 thun akŏ pơjing bruă pơtom hiăp, Khua mir sir pơñă glăi tơlơi ñu ƀuh mơak prong lơ̆m tal nao čuă jơmư gưl kơnuk kơna pơ dêh čar Hàn Quốc phrâo anai, bơni kơ tơlơi tŭ jum hiam mơak, kơdrưh biă mă mơ̆ng Khua mir sir ơi Yoon Suk Yoel hăng khua mua dêh čar Hàn Quốc. Khua mir sir đăo kơnang, hăng bruă mă gum hrom tong ten dua bơnah, Sang phat kơđi dêh čar dua bơnah amra ngă hrom tong ten, tŭ yua hloh djru hrom kơ bruă ngă giăng mah yôm phara anai.

Khua ding jum wai lăng gah bruă sang phat kơđi dêh čar Hàn Quốc ơi Kim Sang Hwan bơni kơ Khua mir sir ơi Nguyễn Xuân Phúc hơmâo pioh mông tŭ jum hăng mơak mơ̆n ƀuh khua mua gah sang phat kơđi dêh čar Việt Nam tŭ jum hăng tơlơi kơdrưh prong. Ñu lăi pơthâo tơlơi mơak lơ̆m dua bơnah dêh čar pơđĭ tui bruă ngă pŭ ƀăn jing Bơnah ngă hrom hlom bom, anai yơh tơhnal phun pran kơtang pioh kơ dua bơnah sang phat kơđi pơtruh nao rai lu bruă mă ngă hrom kơtang hloh kơñ pơgi ni anăp.