VOV4.Jarai - Mơguah lơ 23/2, ƀơi sang bruă Khua mir sir, Khua mir sir ơi Nguyễn Xuân Phúc tŭ jum khua djru bruă Khua mir sir dêh čar Mi kơ tơlơi pơplih ayuh hyiăng John Kerry. Pơpŭ bơni biă mă kơ ơi John Kerry yua gir run ngă hrŏm dua bơnah amăng thun blan rơgao, amăng anun hơmâo bruă pơgăn ayuh hyiăng pơplih, Khua mir sir kiăng Khua djru bruă John Kerry pơtrut pơsur Kơnuk kơna Mi djru ba dong kơ Việt Nam amăng bruă anai. Khua mir sir ăt hok mơ-ak hơdôm tơlơi dưi ngă prong mơng tal rai čuă Việt Nam mơng khua mua dêh čar Mi, hmư̆ hing hloh lĕ tal rai čuă mơng Kơ-iăng khua mir sir yă Kamala Harris, pơtrut tui tơlơi Ngă hrŏm abih bang kơplah wah dua boh dêh čar. Bơni kơ khua mir sir hơmâo pioh mông bưp, ơi John Kerry lăi, hăng tơlơi pơđĭ kyar glăk hiam klă, tơlơi rô nao rai ngă gŏp abih bang Việt Nam - Mi jai hrơi dlăm hloh, sit nik hăng tŭ yua. lăi nao bruă ia rơsĭ jai hrơi blai đĭ hăng kơdư, bơbeč sat biă kơ kual Lŏn dăo ia krông Cửu Long hăng hơdôm kual dơnung, plung mơng Việt Nam, ơi John Kerry brơi thâo, dêh čar Mi amra djru kơ Việt Nam amăng bruă ayuh hyiăng, pơplih apui lơtrik jing apui lơtrik hơdjă, biă ñu apui lơtrik pơkra mơng pơ-iă yang hrơi. rơngiao kơ anun, dêh čar Mi ăt dưi djru kơ Việt Nam pơplih phrâo mrô, bơwih brơi bruă pơđĭ kyar bơwih ƀong huă mơnuih mơnam.

Siu H’Mai: Pơblang