VOV4.Jarai-Tlam lơ 17/8, ƀơi anom bruă khua mir sir, ơi Nguyễn Xuân Phúc Khua mir sir tŭ jum Khua hơđăp dêh čar Israel, ơi Ehud Barak hlăk rai čuă jơmư, mă bruă ƀơi Việt Nam. Khua mir sir ơi Nguyễn Xuân Phúc hok mơak čơkă ơi Ehud Barak hăng bơnai ñu rai čuă Việt Nam hăng brơi thâo, Việt Nam čang rơmang ngă hrom Israel amăng bruă mơ̆ dêh čar anai hơmâo tơlơi gêh găl kah hăng pơblih phrâo pơčeh ia rơgơi, tơlơi kơhnâo, pơkra apui lơtrik yua glăi. Pơ anăp anai, Khua mir sir rơkâo dua bơnah khom pơphun re se ngă bruă bưp nao rai, dong yua tơdruă ƀơi mông jơnum jar kmar.

Khua mir sir čang rơmang, hăng tơlơi gơgrong laih anun kơnuih hing ang mơ̆ng ñu pô, Khua hơđăp dêh čar Israel ăt djru hrom pơtrut hloh bruă ngă giăng mah hiam klă mơ̆ng dua bơnah, boh nik ñu kah pơpha nao rai tơlơi thâo thăi amăng pơphun ĕp bruă mă, pơtrut kơsem min boh thâo ia rơgơi, pơblih tơlơi thâo pơčeh phrâo amăng bruă pơtô,  pơhrăm ba tơlơi thâo ia rơgơi kơ ƀing hlăk ai čơđai muai rơnuk anai

Nay Jek: Pơblang