VOV4.Jarai - Anăp nao ngă lơphet 75 thun hrơi pioh kơ tơhan rơka, tơhan djai pơsăn drơi kơ lŏn ia, tlam lơ 13/7, ƀơi sang bruă Khua mir sir, Khua mir sir ơi Nguyễn Xuân Phúc bưp khua mua pơ ala kơ Anom bruă pơtruh nao rai Khul tơhan hơđăp anih blah ngă đưm Vị Xuyên - Hà Tuyên. Pơhiăp ƀơi mông bưp, Khua mir sir pơsit, Lŏn ia, mơnuih ƀon sang lêng pơpŭ, hơdor na nao kơ tơhan sông kơtang, tơhan djai pơsăn drơi kơ lŏn ia hăng abih bang tơhan tuh rơyuh pran jua gum blah ayăt pơgang Lŏn ia ta; gum pơgôp ngă ƀhêm tui gru grua khăp kơ lŏn ia, sông kơtang mơng mơnuih ƀon sang ta.

Khua mir sir lăng yôm tơlơi gir run mơng Anih blah ngă đưm Vị Xuyên amăng 6 thun akŏ pơdong. Hăng năng ai ñu 22 rơbâo čô ding kơna mă bruă ƀơi 44 grup amăng plơi pla, Khul pơđĭ kyar na nao, hơmâo bruă mă prong, sit nik, pơsir brơi prăk djru mơnuih hơmâo anăn kơnuk kơna djru; thâo hluh, djru ba, juh alum nao rai amăng tơlơi hơdip mơda.

Siu H’Mai: Pơblang