VOV4.Jarai-Lơ 4/8, ƀơi sang bruă khua mir sir, ơi Nguyễn Xuân Phúc Khua mir sir tŭ jum Khua tơring čar Gunma, dêh čar Japan, ơi Yamamoto Ichita rai čuă hăng mă bruă ƀơi Việt Nam. Khua mir sir ơi Nguyễn Xuân Phúc hok mơak brơi thâo, ơi Yamamoto Ichita lĕ khua tơring čar blung a mơ̆ng dêh čar Japan rai čuă Việt Nam tơdơi kơ klin Covid 19, pơphun glăi bruă rô nao rai hơdôm tơring čar mơ̆ng dua bơnah dêh čar, anăp nao hơdor glăi tal 50 thun hrơi ngă giăng mah Việt Nam-Japan amăng thun 2023.

Khua mir sir ơi Nguyễn Xuân Phúc tŭ jum Khua tơring čar Gunma, Japan

Khua mir sir lăi rơđah, ră anai dêh čar Japan ăt jing pô gŏp ngă hrom bơwih ƀong huă ba akŏ hlâo mơ̆ng Việt Nam, jing dêh čar djru prăk čan mơ̆ng ODA mrô sa, pô tuh pơ alin yôm dong tal klâo hăng gŏp ngă hrom sĭ mơdrô dong tal pă mơ̆ng Việt Nam. Khua mir sir lăng yôm tơlơi gir run mơ̆ng Khua tơring čar ơi Yamamoto Ichita amăng bruă mă pơtrut ngă giăng mah hăng Việt Nam thun blan rơgao; boh nik ñu bruă ngă hrom pơphun ngă yang thun phrâo Việt Nam hăng djru mơnuih ƀôn sang Việt Nam ƀơi tơring čar găn rơgao hĭ tơlơi tơnap tap yua klin Covid 19 ngă.

Nay Jek: Pơblang