Kơ tơlơi pơhing ngă tui Hră pơtrun jơnum ruah khua ping gah dêh čar tal XIII, Hră pơtrun jơnum ping gah tơring čar Đồng Tháp tal XI, rơwang bruă thun 2020-2025; bruă ngă tui Hră pơčrâo mrô 35 mơ̆ng Ding jum kơđi čar kơ jơnum ruah khua ping gah djop gưl, anăp nao jơnum ruah khua ping gah dêh čar tal XIV. Pơhiăp amăng mông jơnum, tơdơi kơ hmư̆ tơlơi lăi pơthâo hăng tơlơi pơgôp hiăp mơ̆ng ƀing khua ding jum, anom bruă, Khua git gai ping gah ơi Tô Lâm bơni, lăng yom hăng čih pioh tơlơi gir run, kơtưn đĭ amăng bruă mă, hơmâo pơhrui glăi boh tơhnal tŭ yua mơ̆ng ping gah, gong gai kơnuk kơna hăng mơnuih ƀôn sang tơring čar Đồng Tháp thun blan rơgao.

Lăi pơtong, thun 2025 jing thun pơđĭ kyar kơtang hloh, kiăng ba glăi boh tơhnal lu hloh hăng tơhnal pơkă amăng akŏ bruă pơđĭ kyar bơwih ƀong huă mơnuih mơnam 5 thun, mơ̆ng thun 2021-2025, mơ̆ng Khua mua ping gah tơring čar Đồng Tháp tal XI, rơwang bruă thun 2020-2025, Khua git gai ping gah ơi Tô Lâm rơkâo, khua mua apăn bruă ping gah tơring čar Đồng Tháp khom ơmâo hơdră pơtrut kơtang hloh, ngă tui khut khăt tŭ yua tơhnal pơkă pơđĭ kyar bơwih ƀong huă mơnuih mơnam thun 2025, pơtum nao kơ bruă kơtưn hloh ngă tui tŭ yua djop tơhnal pơkă pioh pơtrut pơđĭ kyar bơwih ƀong huă, pơđĭ tui rơnoh pơhrui glăi kơ mơnuih ƀôn sang.